ಇತರರೊಂದಿಗೆ ನಿಮ್ಮ ಪೋರ್ಟ್‌ಫೋಲಿಯೊವನ್ನು ಹೋಲಿಸುವುದು ಹಲವಾರು ಬಾರಿ ಅನುಮಾನ, ಆತಂಕ ಮತ್ತು ಅನಗತ್ಯ ಬದಲಾವಣೆಗಳಿಗೆ ಕಾರಣವಾಗುತ್ತದೆ. ಈ ಲೇಖನವು ಪೋರ್ಟ್‌ಫೋಲಿಯೊ ಹೋಲಿಕೆಗಳು ಏಕೆ ತಪ್ಪು ದಾರಿಗೆಳೆಯುತ್ತವೆ ಮತ್ತು ಕೇವಲ ಅಲ್ಪಾವಧಿ ಪ್ರದರ್ಶನಕ್ಕಿಂತ ನಿಮ್ಮ ಸ್ವಂತ ಆರ್ಥಿಕ ಗುರಿಗಳೊಂದಿಗೆ ಹೊಂದಾಣಿಕೆ ಹೆಚ್ಚು ಮಹತ್ವದ್ದೆಂಬುದನ್ನು ವಿವರಿಸುತ್ತದೆ.
ಒಬ್ಬ ಸ್ನೇಹಿತ ತನ್ನ ಇತ್ತೀಚಿನ ಲಾಭದ ಬಗ್ಗೆ ಹೇಳುತ್ತಾನೆ. ಸಹೋದ್ಯೋಗಿಯೊಬ್ಬರು ಒಂದು ನಿರ್ದಿಷ್ಟ ಹೂಡಿಕೆಯ ಉತ್ತಮ ಪ್ರದರ್ಶನವನ್ನು ಕುರಿತು ಮಾತನಾಡುತ್ತಾರೆ. ಕುಟುಂಬದ ಸದಸ್ಯರು ತಮ್ಮ ಪೋರ್ಟ್‌ಫೋಲಿಯೊ ಮೌಲ್ಯ ಕಳೆದ ವರ್ಷದಲ್ಲಿ ಹೇಗೆ ಹೆಚ್ಚಾಗಿದೆ ಎಂದು ಹೆಮ್ಮೆಪಟ್ಟು ಹಂಚಿಕೊಳ್ಳುತ್ತಾರೆ.
ಹಠಾತ್ತಾಗಿ ನಿಮ್ಮ ಮನಸ್ಸಿನಲ್ಲಿ ಒಂದು ಪ್ರಶ್ನೆ ಉದಯಿಸುತ್ತದೆ:
“ನಾನು ಏನಾದರೂ ತಪ್ಪು ಮಾಡುತ್ತಿದ್ದೇನಾ?”
ಹೂಡಿಕೆಯ ಪ್ರಯಾಣದ ಯಾವುದೋ ಒಂದು ಹಂತದಲ್ಲಿ, ಬಹುತೇಕ ಎಲ್ಲರೂ ಇದನ್ನು ಅನುಭವಿಸುತ್ತಾರೆ.
ಪೋರ್ಟ್‌ಫೋಲಿಯೊ ಹೋಲಿಕೆ ವೈಯಕ್ತಿಕ ಹಣಕಾಸಿನಲ್ಲಿ ಅತ್ಯಂತ ಸಾಮಾನ್ಯವಾಗಿದ್ದು, ಆದರೆ ಅತ್ಯಂತ ಹಾನಿಕಾರಕವಾದ ಅಭ್ಯಾಸಗಳಲ್ಲಿ ಒಂದಾಗಿದೆ. ಇದು ಗೊಂದಲ, ಆತಂಕವನ್ನು ಸೃಷ್ಟಿಸುತ್ತದೆ ಮತ್ತು ಅನಗತ್ಯ ಕ್ರಮಗಳಿಗೆ ದಾರಿ ಮಾಡಿಕೊಡುತ್ತದೆ.
ಪೋರ್ಟ್‌ಫೋಲಿಯೊ ಹೋಲಿಕೆ ಏಕೆ ಆಕರ್ಷಕವಾಗಿ ಅನಿಸುತ್ತದೆ?
ಹಣವೆಂಬುದು ಬಹಳ ವೈಯಕ್ತಿಕ ವಿಷಯ. ಆದರೆ ಅದೇ ಸಮಯದಲ್ಲಿ ಸಾಮಾಜಿಕವೂ ಹೌದು. ಇಂದಿನ ಜಗತ್ತಿನಲ್ಲಿ ಮಾರುಕಟ್ಟೆಯ ಮಾಹಿತಿ ಎಲ್ಲೆಡೆ ಲಭ್ಯವಿದೆ. ಸಾಮಾಜಿಕ ಜಾಲತಾಣಗಳು, ಮೆಸೇಜಿಂಗ್ ಗುಂಪುಗಳು, ಸುದ್ದಿಶೀರ್ಷಿಕೆಗಳು, ಚೆನ್ನಾಗಿ ನಡೆಯುತ್ತಿರುವುದನ್ನು ಎತ್ತಿ ತೋರಿಸುತ್ತದೆ.
ಇತರರ ಪೋರ್ಟ್‌ಫೋಲಿಯೊ ಉತ್ತಮವಾಗಿ ಪ್ರದರ್ಶನ ನೀಡುತ್ತಿರುವಂತೆ ಕಂಡಾಗ, ಅದು ಸಹಜ ಭಾವನಾತ್ಮಕ ಪ್ರತಿಕ್ರಿಯೆಯನ್ನು ಉಂಟುಮಾಡುತ್ತದೆ. ಅನುಮಾನಗಳು ಹುಟ್ಟುತ್ತವೆ. ಆತ್ಮವಿಶ್ವಾಸ ಕುಗ್ಗುತ್ತದೆ. ನಮ್ಮ ಯೋಜನೆಯಲ್ಲಿ ಯಾವ ಕುಂದುವು ಇರದಿದ್ದರೂ ಏನಾದರೂ ಬದಲಾಯಿಸಬೇಕು ಎಂಬ ಒತ್ತಡ ಹೆಚ್ಚುತ್ತದೆ.
ಈ ಪ್ರತಿಕ್ರಿಯೆ ಮಾನವೀಯ. ಆದರೆ ಅದಕ್ಕೆ ತಕ್ಷಣ ಪ್ರತಿಕ್ರಿಯಿಸುವುದು ನಿಮ್ಮ ಗುರಿಗಳಿಂದ ದೂರ ಮಾಡುವ ನಿರ್ಧಾರಗಳಿಗೆ ಕಾರಣವಾಗಬಹುದು.
ಎರಡು ಪೋರ್ಟ್‌ಫೋಲಿಯೊಗಳ ಉದ್ದೇಶ ಒಂದೇ ಇರದು
ಪೋರ್ಟ್‌ಫೋಲಿಯೊ ಹೋಲಿಕೆ ವಿಫಲವಾಗುವ ಪ್ರಮುಖ ಕಾರಣ ಸರಳವಾಗಿದೆ. ಪ್ರತಿ ಪೋರ್ಟ್‌ಫೋಲಿಯೊವೂ ವ್ಯಕ್ತಿಯ ಜೀವನದ ಆಧಾರದ ಮೇಲೆ ರೂಪುಗೊಂಡಿರುತ್ತದೆ.
ಒಂದೇ ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿದರೂ, ಇಬ್ಬರ ಪರಿಸ್ಥಿತಿಗಳು ಒಂದೇ ಆಗಿರುವುದು ಅಪರೂಪ. ಆದಾಯದ ಸ್ಥಿರತೆ, ಕುಟುಂಬದ ಜವಾಬ್ದಾರಿಗಳು, ಈಗಿರುವ ಆಸ್ತಿಗಳು, ಅವಧಿ, ಅಪಾಯ ಸಹಿಷ್ಣುತೆ – ಇವೆಲ್ಲವೂ ಬೇರೆ ಬೇರೆಯಾಗಿರುತ್ತದೆ.
ಒಬ್ಬರ ಜೀವನದ ಆರಂಭಿಕ ಹಂತಕ್ಕೆ ಹೊಂದಿಸಿದ ಪೋರ್ಟ್‌ಫೋಲಿಯೊ, ಮಧ್ಯ-ಕರಿಯರ್ ಹಂತದಲ್ಲಿರುವವರ ಪೋರ್ಟ್‌ಫೋಲಿಯೊಗಿಂತ ಸಂಪೂರ್ಣ ವಿಭಿನ್ನವಾಗಿರುತ್ತದೆ. ಉದ್ದೇಶ ತಿಳಿಯದೆ ಫಲಿತಾಂಶಗಳನ್ನು ಹೋಲಿಸುವುದು, ಗಮ್ಯಸ್ಥಾನ ತಿಳಿಯದೆ ಪ್ರಯಾಣದ ಸಮಯವನ್ನು ಹೋಲಿಸುವಂತೆಯೇ ಆಗಿದೆ.
ಅಲ್ಪಾವಧಿ ಹೋಲಿಕೆಗಳು ವಾಸ್ತವಿಕತೆಯನ್ನು ಮಸುಕಾಗಿಸುತ್ತವೆ
ಹೆಚ್ಚಿನ ಪೋರ್ಟ್‌ಫೋಲಿಯೊ ಹೋಲಿಕೆಗಳು ಕಿರು ಅವಧಿಯ ಮೇಲೆ ಆಧಾರಿತವಾಗಿರುತ್ತವೆ, ಒಂದು ವರ್ಷ, ಆರು ತಿಂಗಳು, ಕೆಲವೊಮ್ಮೆ ಕೆಲವು ವಾರಗಳು.
ಹೂಡಿಕೆ ಮಾಡಿದ ದಿನಾಂಕ ಬಹಳ ಮಹತ್ವದ್ದು. ಮಾರುಕಟ್ಟೆಗಳು ಸಮಾನವಾಗಿ ಚಲಿಸುವುದಿಲ್ಲ. ವಿವಿಧ ಆಸ್ತಿ ವರ್ಗಗಳು ವಿಭಿನ್ನ ಸಮಯದಲ್ಲಿ ಉತ್ತಮ ಪ್ರದರ್ಶನ ನೀಡುತ್ತವೆ.
ಇಂದು ಆಕರ್ಷಕವಾಗಿ ಕಾಣುವ ಪೋರ್ಟ್‌ಫೋಲಿಯೊ ನಾಳೆ ನಿಧಾನಗತಿಯನ್ನು ಅನುಭವಿಸಬಹುದು. ಇಂದು ನಿಧಾನವಾಗಿ ಕಾಣುವ ಪೋರ್ಟ್‌ಫೋಲಿಯೊ ತನ್ನ ಉದ್ದೇಶವನ್ನು ನಿಷ್ಠೆಯಿಂದ ನೆರವೇರಿಸುತ್ತಿರಬಹುದು.
ಅಲ್ಪಾವಧಿ ಹೋಲಿಕೆಗಳು ಇತ್ತೀಚಿನ ಪ್ರದರ್ಶನವನ್ನು ಹೆಚ್ಚಾಗಿ ತೋರಿಸಿ, ದೀರ್ಘಾವಧಿ ಸ್ಥಿರತೆಯನ್ನು ಮರೆಮಾಚುತ್ತವೆ.
ಅಪಾಯ (Risk) ಹೋಲಿಕೆಗಳಲ್ಲಿ ಕಾಣಿಸದು
ಲಾಭದ ಬಗ್ಗೆ ಮಾತನಾಡುವುದು ಸುಲಭ. ಅಪಾಯದ ಬಗ್ಗೆ ಮಾತನಾಡುವುದು ಕಷ್ಟ.
ಯಾರಾದರೂ ಉತ್ತಮ ಲಾಭದ ಸಂಖ್ಯೆಯನ್ನು ಹಂಚಿಕೊಂಡಾಗ, ಅದಕ್ಕಾಗಿ ತೆಗೆದುಕೊಂಡ ಅಪಾಯವನ್ನು ವಿರಳವಾಗಿ ಚರ್ಚಿಸಲಾಗುತ್ತದೆ. ಹೆಚ್ಚಿನ ಅಪಾಯದಿಂದ ಬಂದ ತಾತ್ಕಾಲಿಕ ಯಶಸ್ಸು ಮಾರುಕಟ್ಟೆ ಬದಲಾಗುವವರೆಗೆ ಆಕರ್ಷಕವಾಗಿ ಕಾಣುತ್ತದೆ.
ಪೋರ್ಟ್‌ಫೋಲಿಯೊವು ಉತ್ಸಾಹವನ್ನು ಗರಿಷ್ಠಗೊಳಿಸಲು ಅಲ್ಲ; ಬೆಳವಣಿಗೆ ಮತ್ತು ಸ್ಥಿರತೆಯ ಸಮತೋಲನ ಸಾಧಿಸಲು ವಿನ್ಯಾಸಗೊಳಿಸಲಾಗುತ್ತದೆ. ಅಪಾಯವನ್ನು ಅರ್ಥಮಾಡಿಕೊಳ್ಳದೆ ಕೇವಲ ಫಲಿತಾಂಶಗಳನ್ನು ಹೋಲಿಸುವುದು ಭವಿಷ್ಯದಲ್ಲಿ ಅಸೌಕರ್ಯಕರ ನಿರ್ಧಾರಗಳಿಗೆ ಕಾರಣವಾಗಬಹುದು.
ಹೋಲಿಕೆಯ ಭಾವನಾತ್ಮಕ ಬೆಲೆ
ನಿರಂತರ ಹೋಲಿಕೆ ಆತ್ಮವಿಶ್ವಾಸವನ್ನು ನಿಧಾನವಾಗಿ ಕುಗ್ಗಿಸುತ್ತದೆ. ಪೋರ್ಟ್‌ಫೋಲಿಯೊ ಸ್ಥಿರವಾಗಿ ಮುನ್ನಡೆಯುತ್ತಿದ್ದರೂ ಅಸಮಾಧಾನ ಉಂಟಾಗಬಹುದು.
ಇದು ಪದೇಪದೇ ಬದಲಾವಣೆ, ಶಿಸ್ತಿನ ಕೊರತೆ ಮತ್ತು ಭಾವನಾತ್ಮಕ ದಣಿವನ್ನು ತರಬಹುದು. ದೊಡ್ಡ ವೆಚ್ಚ ಹಣಕಾಸಿನಲ್ಲಲ್ಲ, ಮನೋವೈಜ್ಞಾನಿಕವಾಗಿದೆ.
ಹೋಲಿಕೆಗೆ ಬದಲು ಏನು ಮುಖ್ಯ?
ಇತರರೊಂದಿಗೆ ಹೋಲಿಸುವ ಬದಲು, ಈ ಕೆಳಗಿನ ಪ್ರಶ್ನೆಗಳು ಹೆಚ್ಚು ಉಪಯುಕ್ತ:
ನನ್ನ ಪೋರ್ಟ್‌ಫೋಲಿಯೊ ನನ್ನ ಗುರಿಗಳಿಗೆ ಹೊಂದಿಕೆಯಾಗುತ್ತದೆಯೇ?
ಇದು ನನ್ನ ಅವಧಿಗೆ ತಕ್ಕದ್ದೇ?
ಮಾರುಕಟ್ಟೆ ಏರಿಳಿತಗಳ ನಡುವೆ ಯೂ ನಾನು ಇದರಲ್ಲಿ ಉಳಿಯಲು ಸಿದ್ಧನಾಗಿದ್ದೇನೇ?
ಇದು ನನಗೆ ಮನಶಾಂತಿ ನೀಡುತ್ತದೆಯೇ?
ಈ ಪ್ರಶ್ನೆಗಳು ಸ್ಪರ್ಧೆಗೆಲ್ಲ, ಹೊಂದಾಣಿಕೆಗೆ ಒತ್ತು ನೀಡುತ್ತವೆ.
ನಿಮ್ಮದೇ ಪ್ರಯಾಣದಲ್ಲಿ ನೆಲೆನಿಂತಿರಿ
ಮಾರುಕಟ್ಟೆಗಳು ಯಾವಾಗಲೂ ವಿಶ್ವಾಸ ಅಥವಾ ಅನುಮಾನವನ್ನು ಉಂಟುಮಾಡುತ್ತವೆ. ಯಾವಾಗಲೂ ಯಾರಾದರೂ ಉತ್ತಮವಾಗಿ ಮಾಡುತ್ತಿರುವಂತೆ ಕಾಣುತ್ತಾರೆ.
ಆದರೆ ದೀರ್ಘಕಾಲಿಕ ಹಣಕಾಸು ಪ್ರಗತಿ ಇತರರನ್ನು ಅನುಕರಿಸುವುದರಿಂದ ಬರುತ್ತಿಲ್ಲ. ಅದು ಸ್ಪಷ್ಟತೆ, ಸಹನೆ ಮತ್ತು ಸ್ಥಿರತೆಯಿಂದ ಬರುತ್ತದೆ.
ಪೋರ್ಟ್‌ಫೋಲಿಯೊ ಹೋಲಿಕೆ ಉಪಯುಕ್ತವಾಗಿ ಕಾಣಬಹುದು, ಆದರೆ ಅದು ನಿಜವಾಗಿ ಮುಖ್ಯವಾದ ವಿಷಯಗಳಿಂದ ಗಮನ ಬೇರ್ಪಡಿಸುತ್ತದೆ. ನಿಮ್ಮ ಹಣಕಾಸಿನ ಪ್ರಯಾಣ ನಿಮ್ಮ ಜೀವನದಿಂದ ರೂಪುಗೊಳ್ಳುತ್ತದೆ, ಇತರರ ಲಾಭದಿಂದಲ್ಲ.
Shreedhara is the Founder & Director of Ara Financial Services Pvt. Ltd. He has an experience of over 2 decades in Financial Service Industry with majority of it in guiding individuals and institutions on their investments requirements.
