ಕಳೆದ ವಾರ ನನ್ನ ಸ್ನೇಹಿತರೊಬ್ಬರು ನನಗೆ ಕರೆ ಮಾಡಿದ್ದರು. ಯೂಟ್ಯೂಬ್ ವಿಡಿಯೋವೊಂದರಲ್ಲಿ ಸಿಕ್ಕ ಷೇರು ಸಲಹೆಯ ಬಗ್ಗೆ ಅವರು ತುಂಬಾ ಉತ್ಸುಕರಾಗಿದ್ದರು. ಯಾವುದೋ ಅಮೆರಿಕದ ಟೆಕ್ ಕಂಪನಿ, ಚಿಪ್ ತಯಾರಿಸುವ ಕಂಪನಿ, ಆ ಕಂಪನಿಯ ಹೆಸರನ್ನೇ ಅವರಿಗೆ ಸರಿಯಾಗಿ ಉಚ್ಚರಿಸಲು ಆಗುತ್ತಿರಲಿಲ್ಲ. ಅವರಿಗೆ ಗೊತ್ತಿದ್ದದ್ದು ಒಂದೇ ಆ ಷೇರು “ತುಂಬಾ ಏರಿದೆ”!

ಇಂತಹ ಮಾತುಕತೆಗಳು ಈಗ ಬಹುತೇಕ ಪ್ರತಿಯೊಂದು WhatsApp ಹೂಡಿಕೆ ಗುಂಪಿನಲ್ಲೂ ನಡೆಯುತ್ತಿವೆ. ಅಂತರರಾಷ್ಟ್ರೀಯ ಹೂಡಿಕೆ ಈಗ ಎಲ್ಲೆಡೆ ಚರ್ಚೆಯಾಗುತ್ತಿರುವ ವಿಷಯ. S&P 500, ಅಮೆರಿಕದ ತಂತ್ರಜ್ಞಾನ ಷೇರುಗಳು ಮತ್ತು ಜಾಗತಿಕ ETFಗಳ ಬಗ್ಗೆ ಪ್ರತಿಯೊಬ್ಬರಿಗೂ ಒಂದಲ್ಲೊಂದು ಅಭಿಪ್ರಾಯ ಇದ್ದೇ ಇದೆ.

ಆದರೆ ನೀವು ಕೇಳಿರುವ ಯಾವುದಾದರೂ ಸಲಹೆಯ ಆಧಾರದ ಮೇಲೆ ಹೂಡಿಕೆ ಮಾಡುವ ಮೊದಲು, ಭಾರತದಲ್ಲಿರುವ ಹೂಡಿಕೆದಾರರ ದೃಷ್ಟಿಯಿಂದ ಅಂತರರಾಷ್ಟ್ರೀಯ ಹೂಡಿಕೆ ಎಂದರೇನು, ಅದು ಹೇಗೆ ಕೆಲಸ ಮಾಡುತ್ತದೆ ಮತ್ತು ಅದರಲ್ಲಿ ಏನು ಗಮನಿಸಬೇಕು ಎಂಬುದನ್ನು ಸ್ಪಷ್ಟವಾಗಿ ಅರ್ಥಮಾಡಿಕೊಳ್ಳೋಣ.

ಅಂತರರಾಷ್ಟ್ರೀಯ ಹೂಡಿಕೆ ಎಂದರೇನು?

ಸರಳವಾಗಿ ಹೇಳುವುದಾದರೆ, ಭಾರತದ ಹೊರಗೆ ಪಟ್ಟಿ ಮಾಡಲಾಗಿರುವ ಕಂಪನಿಗಳ ಷೇರುಗಳು, ಮ್ಯೂಚುವಲ್ ಫಂಡ್‌ಗಳು, Fund of Funds (FoF) ಅಥವಾ ETFಗಳಲ್ಲಿ ನಿಮ್ಮ ಹಣವನ್ನು ಹೂಡುವುದೇ ಅಂತರರಾಷ್ಟ್ರೀಯ ಹೂಡಿಕೆ.

ಇದು ಅಮೆರಿಕದ ದೊಡ್ಡ ತಂತ್ರಜ್ಞಾನ ಕಂಪನಿಗಳಾಗಿರಬಹುದು, ಯುರೋಪಿನ ಪ್ರಸಿದ್ಧ ಗ್ರಾಹಕ ಬ್ರ್ಯಾಂಡ್‌ಗಳಾಗಿರಬಹುದು, ಏಷ್ಯಾದ ಇಂಡೆಕ್ಸ್ ಫಂಡ್‌ಗಳಾಗಿರಬಹುದು, ಈಗ ಹೆಚ್ಚು ಚರ್ಚೆಯಲ್ಲಿರುವ AI ಮತ್ತು ಸೆಮಿಕಂಡಕ್ಟರ್ ಕಂಪನಿಗಳ ಷೇರುಗಳಾಗಿರಬಹುದು ಅಥವಾ ಹಲವು ದೇಶಗಳ ಮಾರುಕಟ್ಟೆಗಳಲ್ಲಿ ಹೂಡಿಕೆ ಮಾಡುವ ಜಾಗತಿಕವಾಗಿ ವೈವಿಧ್ಯಮಯ ಇಂಡೆಕ್ಸ್ ಫಂಡ್‌ಗಳಾಗಿರಬಹುದು.

ನಿಮ್ಮ ಹಣವನ್ನು ಸಾಮಾನ್ಯವಾಗಿ ಅಮೆರಿಕನ್ ಡಾಲರ್‌ನಂತಹ ವಿದೇಶಿ ಕರೆನ್ಸಿಯಲ್ಲಿ ಹೂಡಿಕೆ ಮಾಡಲಾಗುತ್ತದೆ. ನಿಮ್ಮ ಹೂಡಿಕೆಯ ಆದಾಯವು ಆ ಮಾರುಕಟ್ಟೆಗಳು ಮತ್ತು ನೀವು ಹೂಡಿಕೆ ಮಾಡಿರುವ ಆಸ್ತಿಗಳು ಹೇಗೆ ಕಾರ್ಯನಿರ್ವಹಿಸುತ್ತವೆ ಎಂಬುದರ ಮೇಲೆ ಅವಲಂಬಿತವಾಗಿರುತ್ತದೆ.

ಅಂತರರಾಷ್ಟ್ರೀಯವಾಗಿ ಹೂಡಿಕೆ ಮಾಡಲು ಇರುವ ಮೂರು ಮಾರ್ಗಗಳು

ಭಾರತೀಯ ಹೂಡಿಕೆದಾರರಿಗೆ ಸಾಮಾನ್ಯವಾಗಿ ಅಂತರರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ಹೂಡಿಕೆ ಮಾಡಲು ಮೂರು ಪ್ರಮುಖ ಮಾರ್ಗಗಳಿವೆ.

• ಮೊದಲನೆಯದು — ಭಾರತೀಯ Asset Management Companies (AMC) ನೀಡುವ ಅಂತರರಾಷ್ಟ್ರೀಯ ಮ್ಯೂಚುವಲ್ ಫಂಡ್‌ಗಳು.

ಇವುಗಳಲ್ಲಿ Active ಮತ್ತು Passive ಎರಡೂ ರೀತಿಯ ಆಯ್ಕೆಗಳಿವೆ. ನೀವು ಭಾರತದ ಇತರ ಮ್ಯೂಚುವಲ್ ಫಂಡ್‌ಗಳಲ್ಲಿ ಹೂಡಿಕೆ ಮಾಡುವಂತೆಯೇ ರೂಪಾಯಿಗಳಲ್ಲಿ ಹೂಡಿಕೆ ಮಾಡುತ್ತೀರಿ. ನಂತರ ಫಂಡ್ ಮ್ಯಾನೇಜರ್ ಆ ಹಣವನ್ನು ನಿಮ್ಮ ಪರವಾಗಿ ವಿದೇಶಿ ಮಾರುಕಟ್ಟೆಗಳಲ್ಲಿ ಹೂಡಿಕೆ ಮಾಡುತ್ತಾರೆ.

ಆದರೆ RBI ನಿಗದಿಪಡಿಸಿರುವ ವಿದೇಶಿ ಹೂಡಿಕೆಯ ಒಟ್ಟಾರೆ ಉದ್ಯಮ ಮಿತಿ ತಲುಪಿರುವ ಕಾರಣ, ಇಂತಹ ಕೆಲವು ಫಂಡ್‌ಗಳಲ್ಲಿ ಹೊಸ ಹೂಡಿಕೆಗಳನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ.

• ಎರಡನೆಯದು — ವಿದೇಶಿ ಮಾರುಕಟ್ಟೆಗಳಲ್ಲಿ ನೇರವಾಗಿ ಹೂಡಿಕೆ ಮಾಡಲು ಅವಕಾಶ ನೀಡುವ ಸೇವಾ ಪೂರೈಕೆದಾರರ ಮೂಲಕ ಖಾತೆ ತೆರೆಯುವುದು.

ಇದು ಭಾರತೀಯ ಷೇರುಗಳಿಗೆ Demat Account ಬಳಸುವ ರೀತಿಗೆ ಸ್ವಲ್ಪ ಹೋಲುತ್ತದೆ. ಈ ಮಾರ್ಗದಲ್ಲಿ Liberalised Remittance Scheme (LRS) ಅಡಿಯಲ್ಲಿ ಹಣವನ್ನು ವಿದೇಶಕ್ಕೆ ಕಳುಹಿಸಿ ನೇರವಾಗಿ ಷೇರುಗಳಲ್ಲಿ ಹೂಡಿಕೆ ಮಾಡಬಹುದು. ನೀವು ಖರೀದಿಸುವ ಷೇರುಗಳು ನೇರವಾಗಿ ನಿಮ್ಮದೇ ಆಗಿರುತ್ತವೆ.

• ಮೂರನೆಯದು — GIFT City ಮೂಲಕ ಹೂಡಿಕೆ ಮಾಡುವುದು.

ಭಾರತದ International Financial Services Centre (IFSC) ಮೂಲಕ ಕೆಲವು ಆಯ್ದ ಹಣಕಾಸು ಸಂಸ್ಥೆಗಳು ಜಾಗತಿಕ ಹೂಡಿಕೆ ಉತ್ಪನ್ನಗಳಲ್ಲಿ ಹೂಡಿಕೆ ಮಾಡಲು ಅವಕಾಶ ನೀಡುತ್ತವೆ.

GIFT City ಆಧಾರಿತ ಪ್ಲಾಟ್‌ಫಾರ್ಮ್‌ನಲ್ಲಿ ಖಾತೆ ತೆರೆಯುವ ಮೂಲಕ ಮತ್ತು LRS ಅಡಿಯಲ್ಲಿ ನಿಗದಿತ ಮಿತಿಗಳಿಗೆ ಒಳಪಟ್ಟು ವಿದೇಶಿ ಕರೆನ್ಸಿಯಲ್ಲಿ ಹಣವನ್ನು ಕಳುಹಿಸಿ ಹೂಡಿಕೆ ಮಾಡಬಹುದು.

ಈ ಮಾರ್ಗದ ಹೂಡಿಕೆ ರಚನೆ ಮತ್ತು ನಿಯಮಗಳು ಭಾರತೀಯ ಮ್ಯೂಚುವಲ್ ಫಂಡ್‌ಗಳು ಹಾಗೂ ನೇರ ವಿದೇಶಿ ಹೂಡಿಕೆಗಳಿಗಿಂತ ಭಿನ್ನವಾಗಿರುತ್ತವೆ.

ಹೂಡಿಕೆದಾರರು ಅಂತರರಾಷ್ಟ್ರೀಯ ಹೂಡಿಕೆಯತ್ತ ಏಕೆ ಆಕರ್ಷಿತರಾಗುತ್ತಾರೆ?

ಈಗ ಟ್ರೆಂಡ್ ಆಗುತ್ತಿದೆ ಎಂಬ ಕಾರಣಕ್ಕಷ್ಟೇ ಅಲ್ಲ, ಅಂತರರಾಷ್ಟ್ರೀಯ ಹೂಡಿಕೆಯನ್ನು ಪರಿಗಣಿಸಲು ಕೆಲವು ಸಮಂಜಸವಾದ ಕಾರಣಗಳೂ ಇವೆ.

• ಮೊದಲನೆಯದು — ಭೌಗೋಳಿಕ ವೈವಿಧ್ಯೀಕರಣ (Geographical Diversification).

ನಿಮ್ಮ ಸಂಪೂರ್ಣ ಹೂಡಿಕೆ ಪೋರ್ಟ್‌ಫೋಲಿಯೊ ಕೇವಲ ಭಾರತದ ಆರ್ಥಿಕತೆ ಮತ್ತು ಭಾರತೀಯ ಮಾರುಕಟ್ಟೆಯ ಕಾರ್ಯಕ್ಷಮತೆಯ ಮೇಲಷ್ಟೇ ಅವಲಂಬಿತವಾಗಿರುವುದಿಲ್ಲ.

• ಎರಡನೆಯದು — ಭಾರತದಲ್ಲಿ ಕಡಿಮೆ ಪ್ರಾತಿನಿಧ್ಯ ಹೊಂದಿರುವ ಕ್ಷೇತ್ರಗಳಲ್ಲಿ ಹೂಡಿಕೆ ಮಾಡುವ ಅವಕಾಶ.

ಉದಾಹರಣೆಗೆ ಸೆಮಿಕಂಡಕ್ಟರ್‌ಗಳು, ಜಾಗತಿಕ ತಂತ್ರಜ್ಞಾನ ಪ್ಲಾಟ್‌ಫಾರ್ಮ್‌ಗಳು, ಬಯೋಟೆಕ್ನಾಲಜಿ ಮತ್ತು ಏರೋಸ್ಪೇಸ್ ಮುಂತಾದ ಕೆಲವು ಕ್ಷೇತ್ರಗಳಲ್ಲಿ ಭಾರತದಲ್ಲಿ ಹೂಡಿಕೆಯ ಆಯ್ಕೆಗಳು ತುಲನಾತ್ಮಕವಾಗಿ ಸೀಮಿತವಾಗಿರಬಹುದು. ಅಂತರರಾಷ್ಟ್ರೀಯ ಹೂಡಿಕೆ ಇಂತಹ ಕ್ಷೇತ್ರಗಳಲ್ಲಿ ಪಾಲ್ಗೊಳ್ಳುವ ಅವಕಾಶವನ್ನು ನೀಡಬಹುದು.

• ಮೂರನೆಯದು — ದೀರ್ಘಾವಧಿಯಲ್ಲಿ ಕರೆನ್ಸಿ ಸಂಬಂಧಿತ ರಕ್ಷಣೆಯ ಒಂದು ಭಾಗವಾಗಿ ಬಳಸಿಕೊಳ್ಳುವ ಸಾಧ್ಯತೆ.

ಉದಾಹರಣೆಗೆ, ನಿಮ್ಮ ಮಗುವಿನ ವಿದೇಶಿ ಶಿಕ್ಷಣಕ್ಕಾಗಿ ನೀವು ಹಣ ಉಳಿಸುತ್ತಿದ್ದರೆ ಅಥವಾ ನಿಮ್ಮ ಪೋರ್ಟ್‌ಫೋಲಿಯೊದಲ್ಲಿ ವಿದೇಶಿ ಕರೆನ್ಸಿಯ ಸ್ವಲ್ಪ Exposure ಇರಬೇಕೆಂದು ಬಯಸಿದರೆ, ಅಂತರರಾಷ್ಟ್ರೀಯ ಹೂಡಿಕೆ ದೀರ್ಘಾವಧಿಯಲ್ಲಿ ಕರೆನ್ಸಿ ಏರಿಳಿತದ ಪರಿಣಾಮವನ್ನು ಒಂದು ಮಟ್ಟಿಗೆ ಸಮತೋಲನಗೊಳಿಸಲು ಸಹಾಯ ಮಾಡಬಹುದು.

ಆದರೆ ಇದು ಖಚಿತವಲ್ಲ. ಕರೆನ್ಸಿಯ ಮೌಲ್ಯದಲ್ಲಿನ ಬದಲಾವಣೆಗಳು ನಿಮ್ಮ ಪರವಾಗಿಯೂ ಕೆಲಸ ಮಾಡಬಹುದು, ನಿಮ್ಮ ವಿರುದ್ಧವಾಗಿಯೂ ಕೆಲಸ ಮಾಡಬಹುದು.

ತೆರಿಗೆ ನಿಯಮಗಳು ವಿಭಿನ್ನವಾಗಿವೆ

ಅಂತರರಾಷ್ಟ್ರೀಯ ಮ್ಯೂಚುವಲ್ ಫಂಡ್‌ಗಳು ಮತ್ತು Fund of Funds ಮೇಲಿನ Capital Gains ತೆರಿಗೆ ವಿಧಾನವು ಭಾರತದೊಳಗಿನ ಕೆಲವು ಇತರ ಹೂಡಿಕೆಗಳಿಗೆ ಅನ್ವಯಿಸುವ ತೆರಿಗೆ ವಿಧಾನಕ್ಕಿಂತ ಭಿನ್ನವಾಗಿರಬಹುದು.

GIFT City ಮೂಲಕ ಮಾಡುವ ಹೂಡಿಕೆಗಳಿಗೆ ಅನ್ವಯಿಸುವ ತೆರಿಗೆ ವ್ಯವಸ್ಥೆಯೂ ಮತ್ತೆ ವಿಭಿನ್ನವಾಗಿರಬಹುದು.

ಆದ್ದರಿಂದ ಈ ಮಾರ್ಗಗಳಲ್ಲಿ ಯಾವುದರಲ್ಲಾದರೂ ಒಂದು ರೂಪಾಯಿ ಹೂಡಿಕೆ ಮಾಡುವ ಮೊದಲು, ನಿಮ್ಮ ಹೂಡಿಕೆಗೆ ತೆರಿಗೆ ಹೇಗೆ ಅನ್ವಯಿಸುತ್ತದೆ ಎಂಬುದನ್ನು ಸರಿಯಾಗಿ ತಿಳಿದುಕೊಳ್ಳಿ.

ಉತ್ತಮ ಹಣಕಾಸು ಮಾರ್ಗದರ್ಶಕರ ಅಥವಾ Chartered Accountant (CA) ಸಹಾಯ ಪಡೆದು ತೆರಿಗೆ ನಿಯಮಗಳನ್ನು ಸ್ಪಷ್ಟವಾಗಿ ಅರ್ಥಮಾಡಿಕೊಳ್ಳಿ.

ಅಂತರರಾಷ್ಟ್ರೀಯ ಹೂಡಿಕೆಗಳು ನಿಮ್ಮ ಪೋರ್ಟ್‌ಫೋಲಿಯೊದ ಭಾಗವಾಗಬೇಕೇ?

ಇದಕ್ಕೆ ಸರಳ ಉತ್ತರ, ಬಹುಶಃ ಹೌದು. ಆದರೆ ನಿಮ್ಮ ಒಟ್ಟು ಪೋರ್ಟ್‌ಫೋಲಿಯೊದ ಒಂದು ಸಣ್ಣ ಭಾಗವಾಗಿ ಮಾತ್ರ ಮತ್ತು ನಿಮ್ಮ ಹಣಕಾಸಿನ ಮೂಲಭೂತ ಅಡಿಪಾಯ ಗಟ್ಟಿಯಾಗಿರುವ ನಂತರ.

ಬಹುತೇಕ ಭಾರತೀಯ ಹೂಡಿಕೆದಾರರ ಪ್ರಮುಖ ಹಣಕಾಸಿನ ಗುರಿಗಳು ಭಾರತದಲ್ಲಿಯೇ ಇರುತ್ತವೆ. ಆದ್ದರಿಂದ ನಿಮ್ಮ ಹೂಡಿಕೆ ಪೋರ್ಟ್‌ಫೋಲಿಯೊದ ಮುಖ್ಯ ಭಾಗವು ಮೊದಲು ಈ ವಾಸ್ತವಿಕತೆಯನ್ನು ಪ್ರತಿಬಿಂಬಿಸಬೇಕು. ವಿದೇಶಿ ಮಾರುಕಟ್ಟೆಗಳಲ್ಲಿ ಹೂಡಿಕೆ ಮಾಡುವ ಮೊದಲು ನಿಮ್ಮ ಹಣಕಾಸಿನ ಅಡಿಪಾಯ ಗಟ್ಟಿಯಾಗಿದೆಯೇ ಎಂದು ಪರಿಶೀಲಿಸಿ.

ತುರ್ತು ಸಂದರ್ಭಗಳಿಗೆ Emergency Fund ನಿರ್ಮಿಸಿ. ನಿಮ್ಮ ಅಲ್ಪಾವಧಿ ಮತ್ತು ಮಧ್ಯಮಾವಧಿಯ ಗುರಿಗಳಿಗೆ ಬೇಕಾದ ಹಣವನ್ನು ಪ್ರತ್ಯೇಕವಾಗಿ ಮೀಸಲಿಡಿ. ನಿಮ್ಮ Life Insurance ಮತ್ತು Health Insurance ಸಮರ್ಪಕವಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಿ.

ನಿಮ್ಮ ಪ್ರಮುಖ ಹೂಡಿಕೆಗಳನ್ನು ನಿಮ್ಮ ಅಗತ್ಯಗಳಿಗೆ ಸೂಕ್ತವಾದ ಭಾರತೀಯ ಆಸ್ತಿಗಳಾದ Equity Mutual Funds, Multi-Asset Funds ಮತ್ತು ಅಗತ್ಯಕ್ಕೆ ತಕ್ಕಂತೆ Gold ಅಥವಾ Silverನಲ್ಲಿ ಮಿತವಾದ ಹಂಚಿಕೆಯೊಂದಿಗೆ ನಿರ್ಮಿಸಿಕೊಳ್ಳಿ.

ಈ ಮೂಲಭೂತ ಅಡಿಪಾಯ ಗಟ್ಟಿಯಾದ ನಂತರವೇ ನಿಮ್ಮ ಪೋರ್ಟ್‌ಫೋಲಿಯೊದ ಒಂದು ಸಣ್ಣ ಭಾಗವನ್ನು ಅಂತರರಾಷ್ಟ್ರೀಯ ಹೂಡಿಕೆಗಳಿಗೆ ಮೀಸಲಿಡುವುದನ್ನು ಪರಿಗಣಿಸಬಹುದು.

ನೀವು ನಿಮ್ಮನ್ನು ಕೇಳಿಕೊಳ್ಳಬೇಕಾದ ಮುಖ್ಯ ಪ್ರಶ್ನೆ

ಅಂತರರಾಷ್ಟ್ರೀಯ ಹೂಡಿಕೆ ಮಾಡುವ ಮೊದಲು ನಿಮ್ಮನ್ನು ನೀವು ಒಂದು ಪ್ರಶ್ನೆ ಕೇಳಿಕೊಳ್ಳಿ: ನನಗೆ ಜಾಗತಿಕ ಹೂಡಿಕೆಯ Exposure ನಿಜವಾಗಿಯೂ ಏಕೆ ಬೇಕು? ನಿಮ್ಮ ಹೂಡಿಕೆಗಳನ್ನು ವಿವಿಧ ದೇಶಗಳಿಗೆ ಹಂಚಿ ವೈವಿಧ್ಯೀಕರಣ ಮಾಡಲು ಬಯಸುತ್ತೀರಾ? ಭಾರತದಲ್ಲಿ ಸುಲಭವಾಗಿ ಲಭ್ಯವಿಲ್ಲದ ಕ್ಷೇತ್ರಗಳಲ್ಲಿ ಹೂಡಿಕೆ ಮಾಡಲು ಬಯಸುತ್ತೀರಾ? ರೂಪಾಯಿಯ ಮೌಲ್ಯ ಕುಸಿತದ ವಿರುದ್ಧ ಸ್ವಲ್ಪ ರಕ್ಷಣೆ ಪಡೆಯಲು ಬಯಸುತ್ತೀರಾ? ಅಥವಾ ಈಗ ಎಲ್ಲರೂ ಇದೇ ವಿಷಯದ ಬಗ್ಗೆ ಮಾತನಾಡುತ್ತಿದ್ದಾರೆ ಎಂಬ ಕಾರಣಕ್ಕೆ ನೀವು ಕೂಡ ಹೂಡಿಕೆ ಮಾಡಲು ಉತ್ಸುಕರಾಗಿದ್ದೀರಾ?

ಪ್ರಸ್ತುತ ಅಂತರರಾಷ್ಟ್ರೀಯ ಫಂಡ್‌ಗಳ ಬಗ್ಗೆ ಹೆಚ್ಚುತ್ತಿರುವ ಆಸಕ್ತಿಗೆ ಪ್ರಮುಖ ಕಾರಣಗಳಲ್ಲಿ ಜಾಗತಿಕ AI ಮತ್ತು ತಂತ್ರಜ್ಞಾನ ಷೇರುಗಳ ಬಲವಾದ ಆದಾಯ ಹಾಗೂ ಡಾಲರ್ ಎದುರು ರೂಪಾಯಿಯ ಮೌಲ್ಯ ಕುಸಿತವೂ ಸೇರಿವೆ.

ಇವೆರಡೂ ನಿಜವಾದ ಅಂಶಗಳೇ. ಆದರೆ ಇವುಗಳಲ್ಲಿ ಯಾವುದೂ ನೀವು ಅಂತರರಾಷ್ಟ್ರೀಯ ಹೂಡಿಕೆ ಮಾಡಲು ಇರುವ ಏಕೈಕ ಕಾರಣವಾಗಬಾರದು. ಭಾರತೀಯ ಷೇರು ಮಾರುಕಟ್ಟೆಗಳು ಐತಿಹಾಸಿಕವಾಗಿ ದೀರ್ಘಾವಧಿಯಲ್ಲಿ ಉತ್ತಮ ಆದಾಯವನ್ನು ನೀಡಿವೆ.

ನಾಳೆ ಜಾಗತಿಕ ಮಾರುಕಟ್ಟೆಗಳು ಕೆಲವು ವರ್ಷಗಳ ಕಾಲ ನಿರೀಕ್ಷಿತ ಮಟ್ಟದ ಆದಾಯ ನೀಡದಿದ್ದರೆ  ಮತ್ತು ಯಾವುದೋ ಒಂದು ಹಂತದಲ್ಲಿ ಅದು ಸಂಭವಿಸಬಹುದು. ಆಗಲೂ ನೀವು ನಿಮ್ಮ ಅಂತರರಾಷ್ಟ್ರೀಯ ಹೂಡಿಕೆಗಳಲ್ಲಿ ಮುಂದುವರಿಯುವ ವಿಶ್ವಾಸ ಹೊಂದಿರುತ್ತೀರಾ?

ಚೆನ್ನಾಗಿ ರೂಪಿಸಲಾದ ಹೂಡಿಕೆ ಪೋರ್ಟ್‌ಫೋಲಿಯೊದಲ್ಲಿ ಅಂತರರಾಷ್ಟ್ರೀಯ ಹೂಡಿಕೆಗಳಿಗೆ ಖಂಡಿತವಾಗಿಯೂ ಒಂದು ಸ್ಥಾನ ಇರಬಹುದು. ಆದರೆ ಅವು ಎಲ್ಲರಿಗೂ ಸೂಕ್ತವಾಗಿರಬೇಕೆಂದಿಲ್ಲ. ಮತ್ತು ಖಂಡಿತವಾಗಿಯೂ ಅವು ನಿಮ್ಮ ಸಂಪೂರ್ಣ ಹೂಡಿಕೆ ಪೋರ್ಟ್‌ಫೋಲಿಯೊದ ಕೇಂದ್ರಬಿಂದುವಾಗಬೇಕಾಗಿಲ್ಲ.

ನಿಮ್ಮ ಹಣಕಾಸಿನ ಯೋಜನೆ, ಅಪಾಯ ಸ್ವೀಕರಿಸುವ ಸಾಮರ್ಥ್ಯ ಮತ್ತು ದೀರ್ಘಾವಧಿಯ ಗುರಿಗಳಿಗೆ ನಿಜವಾಗಿಯೂ ಹೊಂದುವಷ್ಟು ಮಾತ್ರ ಅಂತರರಾಷ್ಟ್ರೀಯ ಹೂಡಿಕೆಗಳಿಗೆ ಹಣ ಮೀಸಲಿಡಿ.

ಟ್ರೆಂಡ್ ಆಗುತ್ತಿರುವ ಒಂದು Reel ಅಥವಾ WhatsApp Forward ನಿಮ್ಮ ಹೂಡಿಕೆ ನಿರ್ಧಾರವನ್ನು ತೆಗೆದುಕೊಳ್ಳಬಾರದು. ನಿಮ್ಮ ಹಣಕಾಸಿನ ಗುರಿಗಳೇ ನಿಮ್ಮ ಹೂಡಿಕೆಯ ದಿಕ್ಕನ್ನು ನಿರ್ಧರಿಸಬೇಕು.

Disclaimer: Ara Financial Services Pvt. Ltd. is an AMFI – Registered Mutual Fund Distributor (ARN – 76035). The purpose of this blog is to educate public on topics around personal finance, mutual funds & investing. The scenarios mentioned in the blog are to help readers understand the concept clearly. Do not treat our blogs as investment advice or an invitation/recommendation to invest in mutual funds or capital market or take any investment decision. Ara, its employees or the author cannot be held liable for any investment decisions taken on basis of the information in the above blog/article or any other reasons. Please consult an investment advisor or a mutual fund distributor for all your investment needs.