ಇಂದು ನನಗೆ ಸ್ವಲ್ಪ ವಿಭಿನ್ನವಾದ ಒಂದು consultation ಇತ್ತು.

ಮುಂದಿನ ತಿಂಗಳು ಮದುವೆಯಾಗಲಿರುವ ಒಂದು ಜೋಡಿ, ಮದುವೆಯ ನಂತರ ತಮ್ಮ ಹಣಕಾಸನ್ನು ಜೊತೆಯಾಗಿ ಹೇಗೆ ಯೋಜಿಸಬೇಕು ಎಂಬುದರ ಕುರಿತು professional ಮಾರ್ಗದರ್ಶನ ಪಡೆಯಲು ನನ್ನನ್ನು ಸಂಪರ್ಕಿಸಿದ್ದರು.

ಇಂತಹ ಗ್ರಾಹಕರು ಅಪರೂಪ. ಅದರಲ್ಲೂ, ಮದುವೆಗೆ ಮೊದಲೇ ಸ್ವಯಂಪ್ರೇರಿತರಾಗಿ ಹಣಕಾಸಿನ ಸಲಹೆ ಪಡೆಯಲು ಬರುವ ಜೋಡಿಗಳು ಇನ್ನೂ ಅಪರೂಪ. ತಮ್ಮ ಮುಂದಿನ ಜೀವನದ ಬಗ್ಗೆ ಅವರಿಗಿರುವ ದೂರದೃಷ್ಟಿ ಮತ್ತು ಒಟ್ಟಿಗೆ ಜೀವನ ಆರಂಭಿಸುವ ಮೊದಲೇ ಹಣದ ಬಗ್ಗೆ ಮುಕ್ತವಾಗಿ ಮಾತನಾಡಲು ಅವರು ತೋರಿದ ಮನಸ್ಸು ನನಗೆ ನಿಜವಾಗಿಯೂ ಮೆಚ್ಚುಗೆಯಾಯಿತು.

ಮದುವೆ ನಮ್ಮ ದಿನಚರಿಯನ್ನು ಬದಲಾಯಿಸುತ್ತದೆ. ನಮ್ಮ ಆದ್ಯತೆಗಳನ್ನು ಬದಲಾಯಿಸುತ್ತದೆ. ಎಲ್ಲಕ್ಕಿಂತ ಮುಖ್ಯವಾಗಿ, ನಮ್ಮ ಹಣಕಾಸಿನ ಬದುಕನ್ನೂ ಬದಲಾಯಿಸುತ್ತದೆ.

 ಚೆನ್ನಾಗಿ ಸಂಪಾದಿಸುತ್ತಿದ್ದರೂ ಸಂಪತ್ತು ಕಟ್ಟಿಕೊಳ್ಳಲು ಕಷ್ಟಪಡುತ್ತಿರುವ ಅನೇಕ ದಂಪತಿಗಳನ್ನು ನಾನು ನೋಡಿದ್ದೇನೆ. ಅದಕ್ಕೆ ಮುಖ್ಯ ಕಾರಣ, ಅವರು ತಮ್ಮ ಹಣಕಾಸಿಗಾಗಿ ಒಂದು ಜಂಟಿ ಯೋಜನೆಯನ್ನು ರೂಪಿಸಿಕೊಳ್ಳದೇ ಇರುವುದು

ಆದಾಯ ಇದೆ. ಉದ್ದೇಶವೂ ಇದೆ. ಆದರೆ ಒಂದು system ಇಲ್ಲ.

ಆದ್ದರಿಂದ, ವಿವಾಹಿತ ದಂಪತಿಗಳಿಗೆ ಉಪಯುಕ್ತವಾಗುವಂತೆ ಒಂದು ಸಂಪೂರ್ಣ ಹಣಕಾಸಿನ ಚೌಕಟ್ಟನ್ನು ಇಲ್ಲಿ ರೂಪಿಸಿದ್ದೇವೆ. ಮೊದಲ ಬಾರಿಗೆ ಹಣದ ಬಗ್ಗೆ ಮಾತನಾಡುವುದರಿಂದ ಹಿಡಿದು, ನಿಜವಾದ ಜೀವನ ಸಂಗಾತಿಗಳಾಗಿ ದೀರ್ಘಕಾಲದ ಸಂಪತ್ತನ್ನು ಕಟ್ಟಿಕೊಳ್ಳುವವರೆಗಿನ ಪ್ರಮುಖ ಅಂಶಗಳನ್ನು ಇದು ಒಳಗೊಂಡಿದೆ.

ಮನಸ್ಥಿತಿಯ ಬದಲಾವಣೆ: “ನಾನು” ಎನ್ನುವುದರಿಂದ “ನಾವು” ಎನ್ನುವವರೆಗೆ

ನಮ್ಮಲ್ಲಿ ಹೆಚ್ಚಿನವರು ಸಣ್ಣ ಕುಟುಂಬಗಳಲ್ಲಿ ಬೆಳೆದು, ಸ್ವತಂತ್ರವಾಗಿ ಯೋಚಿಸಲು ಕಲಿತಿರುತ್ತೇವೆ.

ನಮ್ಮ ನಿರ್ಧಾರಗಳನ್ನು ನಾವೇ ತೆಗೆದುಕೊಳ್ಳುತ್ತೇವೆ. ನಮ್ಮ ಆಸಕ್ತಿಗಳನ್ನು ನಾವು ಬೆನ್ನಟ್ಟುತ್ತೇವೆ. ನಮ್ಮ ಹಣಕಾಸನ್ನು ನಾವೇ ನಿರ್ವಹಿಸುತ್ತೇವೆ. ಆದರೆ ಮದುವೆಯ ನಂತರ ಈ ಮನಸ್ಥಿತಿಯಲ್ಲಿ ಒಂದು ದೊಡ್ಡ ಬದಲಾವಣೆ ಅಗತ್ಯವಾಗುತ್ತದೆ.

“ನನ್ನ ಮನೆ, ನನ್ನ ಗುರಿಗಳು, ನನ್ನ ನಿರ್ಧಾರಗಳು, ನನ್ನ ಭವಿಷ್ಯ” ಎನ್ನುವುದರಿಂದ,  “ನಮ್ಮ ಮನೆ, ನಮ್ಮ ಗುರಿಗಳು, ನಮ್ಮ ನಿರ್ಧಾರಗಳು, ನಮ್ಮ ಭವಿಷ್ಯ” ಎನ್ನುವ ಕಡೆಗೆ ಸಾಗಬೇಕು.

ಇದರ ಜೊತೆಗೆ ನಮ್ಮ ಹಣಕಾಸಿನ ಪರಿಸ್ಥಿತಿಯೂ ಬದಲಾಗುತ್ತದೆ.

ಹೆಚ್ಚಿನ ಜೋಡಿಗಳು ತಮ್ಮ ಕನಸಿನ ಮದುವೆಯನ್ನು ಯೋಜಿಸಲು ತಿಂಗಳುಗಟ್ಟಲೆ ಸಮಯ ಕಳೆಯುತ್ತಾರೆ. ಮದುವೆ ಮಂಟಪ, ಉಡುಪು, ಊಟ, ಅಲಂಕಾರ, ಮನರಂಜನೆ… ಎಲ್ಲವನ್ನೂ ಬಹಳ ಜಾಗರೂಕತೆಯಿಂದ ಯೋಜಿಸುತ್ತಾರೆ. ಅದು ಸಹಜವೂ ಹೌದು. ಏಕೆಂದರೆ ಮದುವೆ ಜೀವನದಲ್ಲಿ ಒಮ್ಮೆ ಬರುವ ವಿಶೇಷ ಸಂದರ್ಭ.

ಆದರೆ ನಿಜವಾದ ದಾಂಪತ್ಯ ಜೀವನ ಆರಂಭವಾಗುವುದು ಹನಿಮೂನ್ ಮುಗಿದ ನಂತರವೇ!

ಆ ಜೀವನಕ್ಕೆ ಗಟ್ಟಿಯಾದ ಹಣಕಾಸಿನ ಅಡಿಪಾಯವಿಲ್ಲದಿದ್ದರೆ, ಉತ್ತಮ ಆದಾಯ ಗಳಿಸುವ ದಂಪತಿಗಳೂ ಸಹ ಹಣಕಾಸಿನ ವಿಷಯದಲ್ಲಿ ದಿಕ್ಕುತೋಚದ ಸ್ಥಿತಿಗೆ ತಲುಪಬಹುದು.

ಆರೋಗ್ಯಕರ ಹಣಕಾಸಿನ ಪಾಲುದಾರಿಕೆಗೆ 5 ಹಂತಗಳ ಚೌಕಟ್ಟು

ಹಂತ 1: ಹಣದ ಬಗ್ಗೆ ಮೊದಲೇ ಮಾತನಾಡಿ

ಹಣ ನಿರ್ವಹಣೆ ಎನ್ನುವುದು ಮೂಲತಃ ಒಂದು ವರ್ತನಾ ವಿಜ್ಞಾನ — Behavioural Science. ಹಣಕ್ಕೆ ಕೇವಲ ಆರ್ಥಿಕ ಮೌಲ್ಯವಷ್ಟೇ ಅಲ್ಲ, ಬಹಳಷ್ಟು ಭಾವನಾತ್ಮಕ ಮೌಲ್ಯವೂ ಇದೆ. ಆದ್ದರಿಂದ ಹಣದ ಬಗ್ಗೆ ಸಾಧ್ಯವಾದಷ್ಟು ಬೇಗ ಮಾತನಾಡಲು ಆರಂಭಿಸಿ. ಸಾಧ್ಯವಾದರೆ ಮದುವೆಗೆ ಮೊದಲೇ ಈ ಮಾತುಕತೆ ನಡೆಯಲಿ.

ಇಬ್ಬರೂ ಪರಸ್ಪರರ:

• ಆದಾಯದ ಮೂಲಗಳು
• ಮಾಸಿಕ ಖರ್ಚುಗಳು
• ಈಗಿರುವ ಸಾಲಗಳು
• ಈಗಿರುವ ಹೂಡಿಕೆಗಳು
• ಕುಟುಂಬದ ಹಣಕಾಸಿನ ಜವಾಬ್ದಾರಿಗಳು
• ಜೀವ ವಿಮೆ
• ಆರೋಗ್ಯ ವಿಮೆ

ಇವೆಲ್ಲದರ ಬಗ್ಗೆ ಸ್ಪಷ್ಟವಾಗಿ ತಿಳಿದುಕೊಂಡಿರಬೇಕು.

ಆರಂಭದಲ್ಲಿ ಇಂತಹ ಮಾತುಕತೆಗಳು ಸ್ವಲ್ಪ ಮುಜುಗರ ಉಂಟುಮಾಡಬಹುದು. ಆದರೆ ಜೀವನದ ಪ್ರತಿಯೊಂದು ಏರಿಳಿತದಲ್ಲೂ ದಾಂಪತ್ಯವನ್ನು ಗಟ್ಟಿಯಾಗಿ ಹಿಡಿದಿಡುವ ಪರಸ್ಪರ ನಂಬಿಕೆಯನ್ನು ಕಟ್ಟಿಕೊಡುವುದು ಇಂತಹ ಮುಕ್ತ ಮಾತುಕತೆಗಳೇ.

ಹಂತ 2: ಮೊದಲು ಅಡಿಪಾಯವನ್ನು ಗಟ್ಟಿಗೊಳಿಸಿ

ನಿಮ್ಮ ಹಣಕಾಸಿನ ಗುರಿಗಳಿಗಾಗಿ ಒಂದು ರೂಪಾಯಿಯನ್ನಾದರೂ ಹೂಡಿಕೆ ಮಾಡುವ ಮೊದಲು, ಮೂರು ಅತ್ಯಗತ್ಯ ವಿಷಯಗಳು ಸರಿಯಾಗಿರಬೇಕು.

1. ಎಲ್ಲವನ್ನೂ ದಾಖಲಿಸಿ

ಇಬ್ಬರ ಎಲ್ಲಾ ಆದಾಯದ ಮೂಲಗಳನ್ನು ಪಟ್ಟಿ ಮಾಡಿ. ವೈಯಕ್ತಿಕ ಖರ್ಚುಗಳು, ಮನೆಯ ಜಂಟಿ ಖರ್ಚುಗಳು, ಸಾಲದ EMIಗಳು ಮತ್ತು ಕುಟುಂಬದ ಇತರ ಹಣಕಾಸಿನ ಜವಾಬ್ದಾರಿಗಳನ್ನು ಒಂದೇ ಸ್ಪಷ್ಟವಾದ Spreadsheet‌ನಲ್ಲಿ ದಾಖಲಿಸಿ. ದಂಪತಿಯ ಆದಾಯ ಮತ್ತು ಖರ್ಚು ಎರಡೂ ಸರಿಯಾಗಿ ದಾಖಲಾಗಿರಬೇಕು.

2. ತುರ್ತು ನಿಧಿ (Emergency Fund) ನಿರ್ಮಿಸಿ

ಅನಿರೀಕ್ಷಿತ ಪರಿಸ್ಥಿತಿಗಳು ಎದುರಾದಾಗ ಕುಟುಂಬದ ಜೀವನಶೈಲಿ ಮತ್ತು ಹಣಕಾಸಿನ ಜವಾಬ್ದಾರಿಗಳು ಅಸ್ತವ್ಯಸ್ತವಾಗದಂತೆ ಸಾಕಷ್ಟು ತುರ್ತು ನಿಧಿಯನ್ನು ಹೊಂದಿರಿ. ಸಾಧ್ಯವಾದರೆ ಕನಿಷ್ಠ 12 ತಿಂಗಳ ಮನೆಯ ಖರ್ಚುಗಳನ್ನು ನಿಭಾಯಿಸುವಷ್ಟು Emergency Fund ಇರಲಿ.

3. ನಿಮ್ಮ ವಿಮೆಯನ್ನು ಮರುಪರಿಶೀಲಿಸಿ

ಒಬ್ಬ ವ್ಯಕ್ತಿಯಾಗಿ ನಿಮಗೆ ಸಾಕಾಗುತ್ತಿದ್ದ ಜೀವ ವಿಮೆ ಮತ್ತು ಆರೋಗ್ಯ ವಿಮೆ, ಕುಟುಂಬದ ಜವಾಬ್ದಾರಿಗಳು ಆರಂಭವಾದ ನಂತರ ಸಾಕಾಗದೇ ಇರಬಹುದು. ಆದ್ದರಿಂದ ನಿಮ್ಮ ಬದಲಾಗುತ್ತಿರುವ ಅಗತ್ಯಗಳಿಗೆ ಅನುಗುಣವಾಗಿ:

• Term Insurance
• Health Insurance

ಎರಡನ್ನೂ ಮರುಪರಿಶೀಲಿಸಿ ಮತ್ತು ಅಗತ್ಯವಿದ್ದರೆ ವಿಮಾ ರಕ್ಷಣೆಯನ್ನು ಹೆಚ್ಚಿಸಿಕೊಳ್ಳಿ.

ಈ ಮೂಲಭೂತ ಅಂಶಗಳು ಸರಿಯಾದ ನಂತರ, ನಿಮ್ಮ ಬಳಿ ಹೂಡಿಕೆಗೆ ಎಷ್ಟು ಹೆಚ್ಚುವರಿ ಹಣ ಲಭ್ಯವಿದೆ ಎಂಬುದು ಸ್ಪಷ್ಟವಾಗುತ್ತದೆ. ಆಗ ನೀವು ಒಂದು ಸ್ಪಷ್ಟ ಉದ್ದೇಶದೊಂದಿಗೆ ಹೂಡಿಕೆ ಯೋಜನೆಯನ್ನು ರೂಪಿಸಬಹುದು.

ಹಂತ 3: ನಿಮ್ಮ ಜಂಟಿ ಹಣಕಾಸಿನ ಗುರಿಗಳನ್ನು ನಿರ್ಧರಿಸಿ

ಇಬ್ಬರೂ ಒಟ್ಟಿಗೆ ಕುಳಿತು ನಿಮ್ಮ ಹಣಕಾಸಿನ ಗುರಿಗಳ ಬಗ್ಗೆ ಮಾತನಾಡಿ. ನಿಮ್ಮ ವೈಯಕ್ತಿಕ ಕನಸುಗಳು ಯಾವುವು? ನಿಮ್ಮ ಸಂಗಾತಿಯ ಕನಸುಗಳು ಯಾವುವು? ಕುಟುಂಬವಾಗಿ ನಿಮ್ಮ ಜಂಟಿ ಗುರಿಗಳು ಯಾವುವು? ಇವೆಲ್ಲವನ್ನೂ ಪಟ್ಟಿ ಮಾಡಿ.

ನಂತರ ಆ ಗುರಿಗಳು ನಿಜವಾಗಿಯೂ ಸಾಧ್ಯವೇ? ನಿಮ್ಮ ಇಂದಿನ ಜೀವನ ಪರಿಸ್ಥಿತಿಗೆ ಅವು ಇನ್ನೂ ಪ್ರಸ್ತುತವೇ? ಎಂಬುದನ್ನು ಪರಿಶೀಲಿಸಿ.

ಒಂದು ಸರಿಯಾಗಿ ನಿರ್ಧರಿಸಲಾದ ಹಣಕಾಸಿನ ಗುರಿಗೆ ಮೂರು ವಿಷಯಗಳು ಸ್ಪಷ್ಟವಾಗಿರಬೇಕು:

ಕಾಲಮಿತಿ + ಅಂದಾಜು ವೆಚ್ಚ + ಸ್ಪಷ್ಟ ಹಣಕಾಸಿನ ಯೋಜನೆ

ಮನೆ ಖರೀದಿಸುವುದಾಗಿರಲಿ, ಮಕ್ಕಳ ಶಿಕ್ಷಣಕ್ಕಾಗಿ ಹಣ ಸಂಗ್ರಹಿಸುವುದಾಗಿರಲಿ, ಕೆಲವು ವರ್ಷಗಳ Career Break ಅಥವಾ Sabbatical ತೆಗೆದುಕೊಳ್ಳುವುದಾಗಿರಲಿ, ಅಥವಾ ಬೇಗ ನಿವೃತ್ತಿಯಾಗುವ ಗುರಿಯಾಗಿರಲಿ, ಪ್ರತಿಯೊಂದು ಗುರಿಗೂ ಈ ಸ್ಪಷ್ಟತೆ ಅಗತ್ಯ.

ಒಬ್ಬ ಸಂಗಾತಿ ವೃತ್ತಿಜೀವನದಿಂದ ಕೆಲವು ಕಾಲ ವಿರಾಮ ತೆಗೆದುಕೊಳ್ಳಬೇಕಾದ ಪರಿಸ್ಥಿತಿ ಬಂದರೆ, ಆ ಅವಧಿಯಲ್ಲಿ ಒಂದೇ ಆದಾಯದಲ್ಲಿ ಮನೆಯ ಖರ್ಚು ಮತ್ತು ಹೂಡಿಕೆಗಳನ್ನು ಹೇಗೆ ನಿರ್ವಹಿಸಬೇಕು ಎಂಬುದನ್ನೂ ಮೊದಲೇ ಯೋಜಿಸಿಕೊಳ್ಳಿ

ಹಂತ 4: ಒತ್ತಡ ಸೃಷ್ಟಿಸದೆ ಜವಾಬ್ದಾರಿಗಳನ್ನು ಹಂಚಿಕೊಳ್ಳಿ

ದಂಪತಿಗಳ ಹಣಕಾಸಿನ ಯೋಜನೆಯಲ್ಲಿ ಬಹಳಷ್ಟು ಬಾರಿ ಕಡೆಗಣಿಸಲ್ಪಡುವ ಒಂದು ಮುಖ್ಯ ವಿಷಯವೆಂದರೆ ಯಾರು ಯಾವ ಜವಾಬ್ದಾರಿಯನ್ನು ನೋಡಿಕೊಳ್ಳಬೇಕು? ಎಂಬುವುದು. ಈ ಹಂಚಿಕೆ ಇಬ್ಬರಲ್ಲಿ ಯಾರಿಗೂ ಹೊರೆಯಾಗದಂತೆ ಇರಬೇಕು.

ಇದಕ್ಕಾಗಿ ಅನುಸರಿಸಬಹುದಾದ ಒಂದು ಸರಳ ವಿಧಾನವೆಂದರೆ ಎರಡು ಪ್ರತ್ಯೇಕ ಬ್ಯಾಂಕ್ ಖಾತೆಗಳನ್ನು ಇಟ್ಟುಕೊಳ್ಳುವುದು:

1. Main Account — ಉಳಿತಾಯ ಮತ್ತು ಹೂಡಿಕೆಗಳಿಗಾಗಿ
2. Expenses Account — ಮನೆ ಮತ್ತು ಮಾಸಿಕ ಖರ್ಚುಗಳಿಗಾಗಿ

ಪ್ರತಿ ತಿಂಗಳು ಮನೆಯ ಖರ್ಚಿಗೆ ಬೇಕಾದ ಮೊತ್ತವನ್ನು ಸ್ವಲ್ಪ ಹೆಚ್ಚುವರಿ Buffer ಜೊತೆಗೆ ಪರಸ್ಪರ ಒಪ್ಪಿಗೆಯ ಆಧಾರದ ಮೇಲೆ Expenses Account‌ಗೆ ವರ್ಗಾಯಿಸಬಹುದು. ಎಲ್ಲಾ ಹೂಡಿಕೆಗಳು Main Account‌ನಿಂದ ನಡೆಯಲಿ. ಈ ವ್ಯವಸ್ಥೆಗೆ ಮತ್ತೊಂದು ಪ್ರಮುಖ ಭದ್ರತಾ ಪ್ರಯೋಜನವೂ ಇದೆ.

ನಿಮ್ಮ ಹೂಡಿಕೆಯ ಖಾತೆಯನ್ನು ದಿನನಿತ್ಯದ ಖರ್ಚಿನ ಖಾತೆಯಿಂದ ಪ್ರತ್ಯೇಕವಾಗಿ ಇಡುವುದರಿಂದ Online Scam ಮತ್ತು Fraudಗಳಿಗೆ ಹಣಕಾಸಿನ Exposure ಅನ್ನು ಗಣನೀಯವಾಗಿ ಕಡಿಮೆ ಮಾಡಬಹುದು. ಜವಾಬ್ದಾರಿಗಳನ್ನು ನಿಮ್ಮ ಕುಟುಂಬಕ್ಕೆ ಅನುಕೂಲವಾಗುವ ರೀತಿಯಲ್ಲಿ ಹಂಚಿಕೊಳ್ಳಬಹುದು. ಒಬ್ಬರು ಮನೆಯ ಖರ್ಚುಗಳನ್ನು ನೋಡಿಕೊಳ್ಳಬಹುದು, ಮತ್ತೊಬ್ಬರು ಹೂಡಿಕೆಗಳನ್ನು ನಿರ್ವಹಿಸಬಹುದು. ಅಥವಾ ಇಬ್ಬರೂ ಎರಡೂ ಜವಾಬ್ದಾರಿಗಳನ್ನು ಹಂಚಿಕೊಳ್ಳಬಹುದು. ಯಾವ ವಿಧಾನವನ್ನು ಅನುಸರಿಸುತ್ತೀರಿ ಎನ್ನುವುದಕ್ಕಿಂತ ಮುಖ್ಯವಾದುದು, ಆ ನಿರ್ಧಾರವನ್ನು ಇಬ್ಬರೂ ಒಟ್ಟಿಗೆ ತೆಗೆದುಕೊಳ್ಳಬೇಕು, ಅದನ್ನು ದಾಖಲಿಸಬೇಕು ಮತ್ತು ನಿಯಮಿತವಾಗಿ ಮರುಪರಿಶೀಲಿಸಬೇಕು.

ಹಂತ 5: ಒಂದೇ ದಿಕ್ಕಿನಲ್ಲಿ ಸಾಗಿ,  ಪಾರದರ್ಶಕತೆ ಮತ್ತು ಜವಾಬ್ದಾರಿಯನ್ನು ಕಾಪಾಡಿಕೊಳ್ಳಿ

ದಾಂಪತ್ಯ ಜೀವನದಲ್ಲಿ ಯಶಸ್ವಿ ಹಣಕಾಸಿನ ಯೋಜನೆ ಎಂದರೆ ಕೇವಲ ಹೆಚ್ಚು ಹಣ ಸಂಪಾದಿಸುವುದು ಅಥವಾ ಹೆಚ್ಚು ಹೂಡಿಕೆ ಮಾಡುವುದು ಅಲ್ಲ. ಇಬ್ಬರ ಹಣವೂ ಜಂಟಿ ಗುರಿಗಳ ಕಡೆಗೆ ಒಂದೇ ದಿಕ್ಕಿನಲ್ಲಿ ಸಾಗುವಂತೆ ಮಾಡುವುದು. ಇದಕ್ಕಾಗಿ ಕೆಲವು ಸರಳ ಅಭ್ಯಾಸಗಳು ಬಹಳ ದೊಡ್ಡ ವ್ಯತ್ಯಾಸವನ್ನು ತರಬಹುದು:

• ಬ್ಯಾಂಕ್ ಖಾತೆಗಳು, Demat Accounts ಮತ್ತು Mutual Fund Folios ಸೇರಿದಂತೆ ಪ್ರತಿಯೊಂದು ಹಣಕಾಸಿನ ಉತ್ಪನ್ನದಲ್ಲೂ Nomination ಸರಿಯಾಗಿ ದಾಖಲಿಸಿ. ಈ ಮಾಹಿತಿಯನ್ನು ಕುಟುಂಬದವರಿಗೂ ತಿಳಿಸಿ.
• ಆದಾಯ, ಖರ್ಚು ಮತ್ತು ಹೂಡಿಕೆಗಳನ್ನು ಯಾರು ಟ್ರ್ಯಾಕ್ ಮಾಡಬೇಕು ಮತ್ತು ಎಷ್ಟು ಬಾರಿ ಪರಿಶೀಲಿಸಬೇಕು ಎಂಬುದನ್ನು ಮೊದಲೇ ನಿರ್ಧರಿಸಿ.
• ನಿಯಮಿತವಾಗಿ ಹಣಕಾಸಿನ Review ಮಾಡಲು ಸಮಯ ನಿಗದಿಪಡಿಸಿ. ಆ Review ಯಾರು ನಡೆಸಬೇಕು ಎಂಬುದನ್ನೂ ಸ್ಪಷ್ಟಪಡಿಸಿ.
• ಅಗತ್ಯವಿದ್ದಾಗ ಹಣಕಾಸು ತಜ್ಞರ ಸಲಹೆ ಪಡೆಯಿರಿ. ಹಣಕಾಸಿನ ಗುರಿಗಳು, Risk Appetite, ತುರ್ತು ಪರಿಸ್ಥಿತಿಗಳ ಯೋಜನೆ ಮತ್ತು Asset Allocation ಮುಂತಾದ ಪ್ರಮುಖ ನಿರ್ಧಾರಗಳಲ್ಲಿ ವೃತ್ತಿಪರ ಮಾರ್ಗದರ್ಶನ ಬಹಳ ಉಪಯುಕ್ತವಾಗುತ್ತದೆ.

ಆದಾಯ ಗಳಿಸುವ ಪ್ರತಿಯೊಂದು ದಂಪತಿಗೂ ಅರ್ಥಪೂರ್ಣವಾದ ಸಂಪತ್ತನ್ನು ಕಟ್ಟಿಕೊಳ್ಳುವ ಸಾಮರ್ಥ್ಯ ಇದೆ. ಆದರೆ ಅದಕ್ಕೆ ಬೇಕಾಗಿರುವುದು ಕೇವಲ ಉತ್ತಮ ಆದಾಯವಲ್ಲ. ಜಂಟಿ ಉದ್ದೇಶ, ಮುಕ್ತ ಸಂವಹನ ಮತ್ತು ಚೆನ್ನಾಗಿ ಯೋಚಿಸಿ ರೂಪಿಸಿದ ಹಣಕಾಸಿನ ಯೋಜನೆ. ಇವೇ ಜೊತೆಯಾಗಿ ಸಂಪತ್ತು ಕಟ್ಟಿಕೊಳ್ಳುವ ಗಟ್ಟಿಯಾದ ಅಡಿಪಾಯ.

ಆರಂಭದಲ್ಲಿ ಹೇಳಿದ, ನನ್ನನ್ನು ಕನ್ಸಲ್ಟೇಶನ್‌ಗಾಗಿ ಭೇಟಿಯಾದ ಆ ಯುವ ಜೋಡಿಯ ವಿಷಯಕ್ಕೆ ಮರಳುವುದಾದರೆ, ತಮ್ಮ ಜೀವನದ ಈ ಹಂತದಲ್ಲಿ ಯೋಚಿಸಬಹುದಾದ ಬಹುತೇಕ ಎಲ್ಲಾ ಅಂಶಗಳನ್ನು ಪರಿಗಣಿಸಿ, ಅವರು ಈಗ ತಮ್ಮದೇ ಆದ ಒಂದು ಹಣಕಾಸಿನ ಯೋಜನೆಯನ್ನು ಯಶಸ್ವಿಯಾಗಿ ರೂಪಿಸಿಕೊಂಡಿದ್ದಾರೆ.

ಅಷ್ಟೇ ಅಲ್ಲ. ತಮ್ಮ ಯೋಜನೆಯನ್ನು ನಿಯಮಿತವಾಗಿ ಮರುಪರಿಶೀಲಿಸುವುದಾಗಿ ಮತ್ತು ಜೀವನದಲ್ಲಿ ಬದಲಾವಣೆಗಳು ಬಂದಂತೆ ಅಗತ್ಯ ತಿದ್ದುಪಡಿಗಳನ್ನು ಮಾಡಿಕೊಳ್ಳುವುದಾಗಿ ಅವರು ಪರಸ್ಪರ ಮಾತುಕೊಟ್ಟಿದ್ದಾರೆ.

ಹಣದ ಬಗ್ಗೆ ಮಾತನಾಡಲು “ಸರಿಯಾದ ಸಮಯ” ಬರುವವರೆಗೆ ಕಾಯಬೇಡಿ.

ಆ ಮಾತುಕತೆಯನ್ನು ಇಂದೇ ಆರಂಭಿಸಿ. ದಂಪತಿಗಳಾಗಿ ನಿಮ್ಮ ಭವಿಷ್ಯ ಆರಂಭವಾಗುವುದು ಕೇವಲ ಒಟ್ಟಿಗೆ ಬದುಕುವುದರಿಂದಲ್ಲ; ಆ ಭವಿಷ್ಯವನ್ನು ಒಟ್ಟಿಗೆ ಯೋಜಿಸುವುದರಿಂದ.

Disclaimer: Ara Financial Services Pvt. Ltd. is an AMFI – Registered Mutual Fund Distributor (ARN – 76035). The purpose of this blog is to educate public on topics around personal finance, mutual funds & investing. The scenarios mentioned in the blog are to help readers understand the concept clearly. Do not treat our blogs as investment advice or an invitation/recommendation to invest in mutual funds or capital market or take any investment decision. Ara, its employees or the author cannot be held liable for any investment decisions taken on basis of the information in the above blog/article or any other reasons. Please consult an investment advisor or a mutual fund distributor for all your investment needs.